Read Aloud the Text Content

This audio was created by Woord's Text to Speech service by content creators from all around the world.

Text Content or SSML code:

SANCTI Angeli, custodes nostri, defendite nos in proelio, ut non pereamus in tremendo iudicio. V. In conspectu Angelorum psallam tibi, Deus meus. R. Adorabo ad templum sanctum tuum et confitebor nomini tuo. DEUS, qui ineffabili providentia sanctos Angelos tuos ad nostram custodiam mittere digneris, largire supplicibus tuis, et eorum semper protectione defendi, et aeterna sociate gaudere. Per Dominum nostrum Iesum Christum. EXAUDI nos, Domine sancte, Pater omnipotens, aeterne Deus et mittere digneris sanctum Angelum tuum de caelis, qui custodiat, foveat, protegat, visitet atque defendat omnes habitantes in hoc habitaculo. Per Christum Dominum nostrum. Amen. CREDO quod sis angelus sanctus, a Deo omnipotente ad custodiam mei deputatus. Propterea peto, et per illum qui te ad hoc ordinavit, humiliter imploro, ut me miseram fragilem atque indignam semper et ubique in hac vita custodias, protegas a malis omnibus atque defendas, et cum Deus hinc animam meam migrare iusserit, nullam in eam potestatem daemonibus habere permittas, sed tu eam leniter a corpore suscipias, et in sinu Habrae1 suaviter usque perducas iubente ac iuvante creatore ac salvatore Deo nostro, qui est benedictus in saecula saeculorum. Amen. OBSECRO te, angelice spiritus, cui ego ad providendum commissus sum ut custodias me indesinenter, protegas, visites, et defendas ab omni incursu diaboli. Vigilantem atque dormientem, nocte ac die, horis continuis atque momentis confove me. Ubicumque iero, comitare mecum. Repelle a me per virtutem Dei omnem tentationem satanae et quod mea non exigunt merita tuis precibus obtine apud misericordissimum iudicem, ut nihil in me habeat locum contrariae virtutis admixtio. Cumque me per abrupta vitiorum de via esse videris, per semitas iustitiae incedendo ad redemptorem meum reducere satagas et, in quacumque necessitate vel in quacumque angustia me esse perspexeris, auxilium Dei omnipotentis tuo obtentu super me adesse sentiam. Precor te custos meus ut si fieri possit notum mihi facias finem meum. Et, cum de hoc corpore ductus fuero, non dimittas malignos spiritus terrere me aut illudere, neque in foveam desperationis inducere. Et non derelinquas me, iubente Deo, donec ad visionem conditoris mei perducas, in qua simul et ego pro opere et tu pro custodia mea una cum beatissima Dei genetrice sanctisque angelis et omnibus sanctis perenniter laetemur. Amen. Angele, qui meus es custos pietate superna, me tibi commissum serva, tueare, guberna terge meam mentem vitiis et labe veterna assiduusque comes mihi sis vitaque lucerna. Angele, fide comes, sapiens, venerande, benigne, me movet et turbat mortis formido malignae intentatque mihi poenas et tartara digne, tu succurre, precor, barathri ne mergar in igne. Angele, confiteor, quia saepe fidem violavi spiritibusque malis numeroso crimine favi et praecepta Dei non, sicut oportet, amavi, proh dolor, et Christum prave vivendo negavi. Angele, quando meos actus per singula tango meque reum mortis video, per singula plango, ora rigo lacrimis, mentem cruciatibus ango his me solve malis, et laudes votaque pango. Angele, me iugi tua salvet cura rogatu, ne pro multimodo peream damnerque reatu, me de terribili tua liberet ars cruciatu, dignus ut angelico possim fieri comiatu. Angele, qui nosti, quae sunt in fine futura, qui medicus meus es, mea spes, mea vulnera cura, vulnera, mens quibus est, nisi cures me, peritura ergo mei cordis fac sint penetralia pura. ANGELE DEI, qui custos es mei, Me tibi commissum pietate superna Hodie, Hac nocte illumina, custodi, rege, et guberna. Amen. Angele qui meus es custos, pietate superna me tibi comissimum, salva, defende, guberna. O tu dulcis angele, qui mecum moraris, licet personaliter mecum non loquaris, animam cum corpore precor tuearis, tuum hoc est officium, ad quod assignaris. V. O beate angele, nunti Dei nostri. R. Actus meos regula ad votum Dei altissimi. Oremus Deus, qui sanctorum angelorum tuorum aliquos tibi benigne concedis assistere et aliquos iubes hic in terris hominibus misericorditer ministrare, concede propitius sic angelum mihi comissimum ad custodiam me in bonis dirigere, ad virtutes assidue excitare, et a peccatorum voragine potentissime liberare, quatenus in districto iudicio quando fiet unum ovile hominum ac etiam angelorum, sub tanto pastore merear inter sui gregis pecora numerari. Per Christum Dominum Nostrum. Amen O SANCTE angele Dei, minister caelestis imperii, cui Deus omnipotens mei custodiam deputavit per maiestatem eius et pietatem te humiliter deprecor, ut custodias animam meam et corpus meum et omnes sensus meos a pravis et illicitis desideriis a noxiis, vanis, et immundis cogitationibus, et ab illusionibus malignorum spirituum a pollutione mentis et corporis et ab insidiis inimicorum meorum visibilium et invisibilium quaerentium animam meam et sis mihi protector tutus, ubicumque iero diebus ac noctibus, horis atque momentis, et conserva me in mundo opere et confirma me in timore et amore Iesu Christi cum sanctis desideriis et post hanc miseram et caducam vitam perduc animam meam ad aeternam felicitatem ubi cum Deo et omnibus sanctis gaudeat sine fine praestante Domino nostro Iesu Christo cui est honor et gloria in saeculorum saecula. Amen. O ANGELICE Spiritus, diligentissimus huius vitae dux, gratias tibi ago ex toto corde meo pro omni amore et fide, quibus adhuc me affectus es. Indulge meae levitati, quod tam saepe tuas sanctas inspirationes non secutus sum et per inoboedientiam meam tibi magnum et acerbum dolorem commovi. Repelle a me per virtutem sancti Crucis omnem tentationem satanae, et quod mea non exigunt merita, tuis precibus obtine apud Deum. In quacumque tribulatione vel angustia me esse perspexeris, auxilium Dei omnipotentis tuo obtentu et precamine mihi adesse sentiam. Commendo tibi hodie et in perpetuum corpus, cor, et animam meam, memoriam, intellectum et voluntatem, appetitus meos et sensus meos, ut me custodias, dirigas et gubernes ac simul purifices, illumines et perficias, ita ut omnibus bonis per te plenus, perseverem semper in gratia, donec simul tecum Deum meum videam et eo fruar in gloria. Amen. OBSECRO te, Angelice spiritus, Custos ac Tutor meus fidelis, ut me custodiae ac protectioni tuae ex divina bonitate commissum, in via pacis, prosperitatis et salutis, hodie semperque dirigas atque ab omni spiritu malo, gravique tentatione defendas. Nosti enim dulcissime Custos, quia conditus sum ad Dei ipsius nostri Creatoris imaginem redemptus quoque pretio tam magno, id est, Christi sanguine, de potestate Satanae Tibi vero Dei providentia in curam et tutelam traditus. Et quorsum haec omnia nisi, ut non perderet hostis invidia, quem tanta circumdata Dei bonitas et clementia. Adsiste tu ergo mihi fideli custodia, ne frustrentur in me tanta divinae bonitatis insignia. Rogo te carissime Angele, per amorem clementissimi Dei quo, caeteris Angelis reprobis de fastigio felicitatis suae per superbiam corruentibus, tu una cum bonis in gratia et gloria servatus es Precor, inquam, ut et ego te favente et iuvante sentiam efficax Dei auxilium, quo server a lapsu et periculis, in gratia vero, bonisque operibus, et Dei creatoris mei cultu et amore constans permaneam donec ad visionem eius in caelesti patria perveniam, eumque una tecum et Sanctis omnibus laudem per omnia secula. Amen. Pater noster. Ave Maria. V. Angelis suis mandavit de te. R. Ut custodiant te in omnibus viis tuis. V. Domine, exaudi orationem meam, R. Et clamor meus ad te veniat. Oremus Omnipotens sempiterne Deus, qui me, licet indignum, ad imaginem tuam creasti et Angelum tuum sanctum ad mei custodiam deputasti da mihi, servo tuo, illius ductu et custodia, malorum omnium tam animae quam corporis pericula feliciter pertransire et post huius vitae curriculum, ad gaudia sempiterna pervenire. Per Christum Dominum nostrum. Amen. V. Domine labia mea aperies. R. Et os meum annuntiabit laudem tuam. V. Converte nos, Deus salutaris noster. R. Et averte iram tuam a nobis. V. Deus in adiutorium meum intende. R. Domine ad adiuvandum me festina. V. Gloria Patri, et Filio, et Spiritui Sancto. R. Sicut erat in principio, et nunc, et semper, et in saecula saeculorum. Alleluia. CUSTODES hominum psallimus Angelos, naturae fragili quos Pater addidit caelestis comites, insidiantibus ne succumberet hostibus. NAM, quod corruerit proditor angelus, concessis merito pulsus honoribus, ardens invidia, pellere nititur quos caelo Deus advocat. HUC, custos, igitur pervigil advola, avertens patria de tibi credita tam morbos animi, quam requiescere quidquid non sinit incolas. CHRISTE, sanctorum decus Angelorum Rector humani generis et auctor, nobis aeternum tribue benigne scandere caelum. ANGELUM pacis, Michael ad istam caelitus mitte, rogitamus aulam nobis ut crebro veniente crescant prospera cuncta. ANGELUS fortis Gabriel, ut hostem pellat antiquum, volitet ab alto, saepius templum veniat ad istud visere nostrum. ANGELUM nobis medicum salutis mitte de caelis Raphael, ut omnes sanet aegrotos, pariterque nostros dirigat actus. SANCTI Angeli, custodes nostri, defendite nos in proelio, ut non pereamus in tremendo iudicio. V. In conspectu Angelorum psallam tibi, Deus meus. R. Adorabo ad templum sanctum tuum et confitebor nomini tuo. DEUS, qui ineffabili providentia sanctos Angelos tuos ad nostram custodiam mittere digneris, largire supplicibus tuis, et eorum semper protectione defendi, et aeterna sociate gaudere. Per Dominum nostrum Iesum Christum. HAS horas canonicas cum devotione Dixi, custos Angele tui ratione Precor, me custodias mortis in agone, Et praesens me deducas in caeli regione. ANGELE Dei, qui custos es mei, Me tibi commissum pietate superna Hac nocte illumina, custodi, rege, et guberna. Amen. Oratio Deus, qui miro ordine Angelorum ministeria hominumque dispensas concede propitius, ut a quibus tibi ministrantibus in caelo semper assistitur, ab his in terra vita nostra muniatur. Per Dominum nostrum. Amen.